ภตฺตปีณฺเฑน สงฺคณฺหิํ, ตมฺปิ ทานํ ผลาวหํ;

ตโต ปฏฺฐาย นาโหสิ, อนฺนปาเนน อูนตาฯ

[13]

สุลภนฺนปาโน สุขิโต, อโหสิํชาติชาติยํ;

อชฺชาปิ ยทิ อิจฺฉามิ, โภชเนน ปโยชนํฯ

[14]

จกฺขุปเถ สมนฺตา เม, ชายนฺตุกฺขลิโย พหู;

อถาปรมฺปิ กุสลํ, อกาสิํตํ สณาถ เมฯ

[15]

อิณฏฺฐกสฺส โปสสฺส, อทาเสกํ กหาปณํ;

เตน เม ปุญฺญกมฺเมน, อโนมภวสมฺปทํฯ

[16]

ปจุรํ ชาตรูปญฺจ, ลภามิ ชาติชาติยํ;

สจชฺช ธนกาโมหํ, ฆนเสโลปิ ปพฺพโต;

โหติ เหมมยํ สพฺพํ, อิณโต โมจเน ผลํฯ

[17]

อญฺญมฺปิ มม ปุญฺญํ โภ, สุณาถ สุติโสภนํ;

กสฺสปสฺส ภควโต, สาสเนกํ พหุสฺสุตํฯ

[18]

เทเสนฺตํ มุนิโน ธมฺมํ, สุตฺวา ปีณิตมานโส;

ปูเชสิํสาฏกํ มยฺหํ, ธมฺมสฺส ธมฺมสามิโนฯ

[19]

เตนาหํ ปุญฺญกมฺเมน, สํสรํ เทวมานุเส;

ลภามิ ปจุรํ วตฺถํ, ยํ โลกสฺมิํ วรํ ปรํฯ

[20]

อิจฺฉมาโน สเจ อชฺช [ชานมาโนปหํอชฺช; ชานธาโนจหํอชฺช อิติกตฺถจิ], หิมวนฺตมฺปิ ปพฺพตํ;

นานาวิราควตฺเถหิ, ฉาทยิสฺสํ สมนฺตโตฯ

[21]

สเจ อิจฺฉามิ อชฺเชว, วตฺเถนจฺฉาทยา มิเต;

ชนฺตโว จตุทีปสฺมิํ, วตฺถทานสฺสิทํ ผลํฯ

[22]

เอเตสํ ปุญฺญกมฺมานํ, วาหสา กามภูมิยํ;

สมฺปตฺติ มนุภุตฺวาน, สาวตฺถิปุร มุตฺตเมฯ

[23]

ชาโต กุเล มหาโภเค,

วุทฺธิปฺปตฺโต สุเขธิโต;

ตสฺส ธมฺมํ สุณิตฺวาน,

ปพฺพชิตฺวาน สาสเนฯ

[24]

โลกุตฺตรํ อคฺครสํ, ภุญฺจนฺโต มุนิวาหสา;

กิเลเส ปชหิตฺวาน, อรหตฺตมปาปุณิํฯ

[25]

กุสลํ นา วมนฺตพฺพํ, ขุทฺทกนฺติ กทาจิปิ;

อนนฺตผลทํ โหติ, นิพฺพาณมฺปิ ททาติ ตํฯ

อถสฺส ธมฺมเทสนํ สุตฺวา ภิกฺขู จ มหาชโน จ ทานาทิกุสลกมฺมํ กตฺวา เยภุยฺเยน สคฺคปรายณา อเหสุํติฯ

[26]

มโนปสาเทนปิ อปฺปปุญฺญํ,

เอวํ มหนฺตํ ภวตีติ ญตฺวา;

มา อปฺปปุญฺญนฺติ ปมชฺชถมฺโภ;

สราถ เทวิํ อิธ ลาชทายิํฯ

สทฺโธปาสกสฺส วตฺถุํ สตฺตมํฯ

28. กปณสฺส วตฺถุมฺหิ อยมานุปุพฺพีกถา

อมฺหากํ ภควติ ปรินิพฺพุเต พาราณสีนครวาสี เอโก ทุคฺคตปุริโส ปรเคเห ภติํกตฺวา ชีวิกํ กปฺเปติ, ตสฺมิํ สมเย นครวาสิโน เยภุยฺเยน ตสฺมิํ ตสฺมิํ ฐาเน มณฺฑปาทโย การาเปตฺวา มหาทานํ เทนฺติ, ตํ ทิสฺวา ทุคฺคโต เอวํ จินฺเตสิ, อหํ ปุพฺเพ อกตปุญฺญตฺตา ปรเคเห ภติํ กตฺวา กิจฺเฉน กสิเรน ชีวามิฯ นิวาสนปารุปนมฺปิ วาสฏฺฐานมตฺตมฺมิ ทุกฺขโต ลภามิฯ อิทานิ พุทฺธุปฺปาโท วตฺตติ ภิกฺขุสงฺโฆปิฯ